բարև

բարև
սովորություն
առավոտ շուտ զարթնելու որոշման նման
ուշ զարթնելու սովորություն
բարև
ատում եմ քեզ սիրուն լինելուդ չափ
ինչ սիրուն ես լկտի․

125...

դասական, բան

ու ․․․ դասական սինուսոիդ

իմ մեջ արթնանում է,

ու իմ մեջ արթնանում է կորությունը․

ու ավտոբուսից ներքև

էլի դասական

ու էլի դասական ուղի՜․

ու մակընթացում

ինքնության բարձրացում -

մինչև իմ բարձրությունը

աստիճաններ

ու աստիճանները տրոփում են

․․․ ներքև է իջնում է աշունը․ 

125...

ձուկ

իմ բարեկամ ձևակերպված մարդ,
ստանդարտ ձուկ,
տնտեսական ճգնաժամ, բան,
երկար-երկար տարիների կյանք․
ու էլի մի երկու ստանդարտ բաներ,
ու ստանդարտ ճառ,
որից գլուխ չեմ հանել երբեք,
ծխի մեջ դեմքդ հազիվ եմ նշմարում
իմ բարեկամ․

125...

Ստվեր

մի օր մտածում էի (բա իհարկե)
մի օր մտածելուց առաջ (դիետա չե՜նք պահում)
ու մտածելուց հետո (ու ո՜չ դեղերին)
երկարում էի
շարունակում էի երկարել (հայոց հարցի պես)

իմ իսկ հարուցած ստվերի ներքո
մի քանի եղանակ արդեն ապրել են
մի քանի միամիտ տապից փախածներ
միամիտ երազներ էին պատմում
(ես հո լսում էի)
տուն, բան, ծիտիկներ
իմ իսկ հարուցած ստվերի ներքո
հով է, հանգստացիր մի քիչ էլ
մինչ կերկարեմ․

125․․․

Տապ

անսովոր շոգից
քափ-քրտինք կտրած
շիկացած կրակ,
շիկացած էակ,
շիկացած ասֆալտ,
ի՜նչ շիկնելու եղանակ է.
շիկնելու իմիտացիա
ու շոգ, շոգ,
հարյուր աստիճանի շոգ․
կիսամերկ կուրծքը շնչել է ուզում,
շիկնել է․

125․․․

Շան երես

նետում եմ դուրս,

ու ներս է մնում

խոսում եմ հետը՝

արձագանք չկա՜․

սովորաբար խոսում եմ

ներսում,

սովորաբար

գեղեցիկ ծաղիկներ եմ մտաբերում

նետելիս․

125․․․

դեղին

ծաղկաթափն էլ եղավ․
երգում եմ, հո՜, հորովել
հո եզո ջան,
բան․
ոչ վար կա անելու,
ոչ կալս՝ կալսելու,
ոչ ես,
բան էլ չկա․
ապուն մատաղ,
կուճիր հոտաղ ջան
խոտն էլ հնձեցի
շոգին․
ծաղկաթափն էլ եղավ․

125․․․

վիրահատում

ու ի՞նչ ես փնտրում -

դատա՜րկ-դատա՜րկ մի պուտ ցնծում,

ու մի պո՜ւտ տոթ․

դու ի՜նչ ես կորցրել

վիրահատումից․

առաջին անգամ մինչև վերջ չոքած

թքում եմ մի պուտ կորուստ

ու լպստում եմ աղոթք․

առաջին անգամ մինչև վերջ չոքած

աղոթում եմ - խեղճության համար․

125...

ուրախանում եմ

ինչ որ լավ է ստացվել.
ինչ լավ է փոխել
մարդը
բանաստեղծությամբ․

125․․․

***

ու կեսգիշերից հետո էլ քնել չի լինում․

ու մեկ էս կողմ ու մեկ այլ կողմ եմ դնում

բացակայությունը․

ու կեսգիշերից հետո էլ

անընդհատ բացակայում եմ,
անընդհատ մակընթացում եմ,

ու քունս չի տանում,

ու անընդհատ հե՜տ եմ շրջվում․

125․․․

դիալոգ

ծիտիիիիկս,
ինչ վատ ա, որ
որ սպսում եմ, սպասում ես
ու լռում, լռուու՜մ գիշերը,
ու էլ չեմ ասում,
որ էսօր լավ էրազ էի տեսել,
էսօր հոգնել էի ահավոր շատ,
էսօր քեզ զանգել էի ուզում նաև,
գործից էի փախել,
էսօր ինչքա՜ն բան կար պատմելու․

քոմմենթներդ էի կարդացել․
էդ ինչ ա եղել ո՞ր․

125․․․

ինձնից ներս

վերջ․

ինձ չգտնելու համար

ինձ թաքցնում եմ պատերի անկյունում,

իմ իսկ հորինած

երկրի տակ ու երկրի վրա,

ինձնից ներս ու ինձնից դուրս նաև,

․․․ որ ուղիղ անկյան տակ

իմ հայելային արտապատկերումից

չվախենամ

ու ինձ չհարցնեմ, ապեր, բա էս ուր՞․

սով ու աղետ․
վազում եմ, փախենու՜մ եմ, թաքնվում․

125․․․

ինձ թեքվիր էլի

ու այնպես ցանկալի ես ինձ,
ինձ թեքվիր էլի,
լսու՞մ ես, թեքվի՛ր,
մի՛ մեռիր այդպես․

ինձնից ներս ու դուրս եմ անում,
ինձնից սպասում եմ քեզ,
ինձնից քեզ եմ ուզում,
ու մերժում ինձ կրկին․

իմ ու քո փոխարեն
որոշում եմ լռել,
որոշում եմ խոսել նաև
ինձ դուր եկած ազգերի լեզվով,
ու կրկին հասկանում, որ դու,
դու՛ լեզու չունե՜ս․

իմ պատուհանից ներս ու դուրս եմ,
ու իմ սենյակում օտարացած,
էհհ, հետ եմ գալիս էլի,

լսու՞մ ես, ինձ թեքվի՛ր,
մի՛ մեռիր այդքան․

125․․․

կրկին

միլիոն անգամ ես ու դու ասածի պես կրկնվում եմ էլի․
անհարիր մանկանալով
իմ ուսին եմ թեքվում քեզ նմանակելու համար․

125...

ռեգեներացիա

ցեղը մի տեսակ լռելայն ու ցավոտ մեռնում էր հանգիստ,
տնտեսագիտության բոլոր կանոններով սահմանված
ագահությունը բթացնում էր ցեղատեսակն
ու ․․․ սպանում էր մանրամասնորեն․

ցիվիլիզացիա․
խնամքով մի քանի տասնամյակ պահված գործիքից արդեն
ժանգահոտը ցած էր կախվում․
ցեղատեսակի եսիմ որ օրենքով վաղուց սահմանած էր -
պահել, պահպանել և օգտագործել ըստ արժանավույն,
երբ ցեղն հանդիսավոր պայմաններում
հանդիսավոր կպարտադրի առաջինանգամյա գործարկում
և փորձ․

գոյապայքար.
անիմաստ էր շատ
ես մեռնող ցե՛ղ ունեմ,
ես չե՜մ կարող խոսել քեզ դուր եկած ցեղատեսակի լեզվով․

125

․․․

իմ մոտ մնացած վերջին մանրը չէ,
ամենն եմ քեզ տալիս, խո՛զ․

125․․․

անջատում

Երակների փոխարեն ․․․
էլեկտրալարեր են ձգվում,
Չգիտեմ - մինչև եսիմ ուր․
Այդպես է լինում նաև վիրահատումից․
Երևի՝ ․․․ անջատում․

125․․․

գարուն

անու՞նդ (գարունն անասուն անուն ուներ ․․․ սպասելուց)․
տուֆտա՜, բլիիի՜ն (էլ չեմ քրֆում կանանց ներկայությամբ)
ու պարզ էր -
ինքնակառուցումն ավարտելուց հետո արժեր
․․․ անուն հորինել․

մեծացիր մի քիչ էլ,
մինչ կարմրելը պարտադիր ու էական դառնա․
մինչ ծաղիկներն անասուն խոտ չլինեն․
բա մտածում ենք, չէ՞,
թարմ օդ խմելուց հետո ստացվում է,
գյու՜տ․
գնում ենք 3D ինքնահաստատմա՜ն․

125․․․

սատկե՜լ եմ

բաժակում անկապ մնացած ջրի պես իներտ եմ,
մեջս սատկե՜լ եմ, գարու՛ն․

125․․․

ժպիտ

դասարգվում ենք,
ցնծում ենք վերևից ներքև․

գիտեմ, ժպիտը ֆիզիոլոգիական ծագում ունի․
դու էլ փորձիր․

125․․․

երկոտանի

հա, առավոտ շուտ պետք էր զարթնել
մի քիչ փնթփնթալով սկսել օրն ու գործ անել․
հազար մեկ երրորդ անգամ զարթնելուց հետո
առաջին անգամ երկոտանին իրեն տեսավ,
պատուհանից դուրս նայեց,
ջազ լսեց, թեյեց
ստացվում էր,
մի տեսակ նորահայտ դեմքով
ես ու դու արեց,
խոսեեեեե՜ց․
ավարտվում էր դինոզավրերի ժամանակաշրջանը․

մի քիչ ռոմանտիկները ծաղիկ ու կանաչ խոտերի մասին խոսեցին,
մի քիչ էլ՝ արևից, բանից,
թե երկոտանին ինչպես տեսավ արև, բան,
ինչպես չափեց դարպասներից այն կողմի աշխարհը
ֆիզիկոսներին ու իրենց անհայտ մնացած չափման մեծություններով․
ինքս լսեցի-
լու՛րջ, գրողը տանի,
երկոտանին հելլօ էր ասում,
գժվելու չափ շատ էի սպասել․
էվոլյուցիան կերտել էր շնչասպառության հասնելու եղանակ․

125․․․

դան

քվեարկությունից հետո՝ բարի գիշերում,
պարտությունը՝ գիշերելու չափ հաճելի,
իհարկե, զարմանալի էր, բայց առավոտյան պտուղ էր տվել
գիտակցված անպտղությունը․

125․․․

կիսգիշերն անցից հետո

No results found for your query.

Check your spelling or try another term.

Spell-ում եմ էլի - another term․
12-00․
ատամնանիվի գլորումից հետո դադարում է գործել
տանջամահությունը․
կիսգիշերն անցից հետո
գործում են այլ տանջամահություններ․


125․․․